भदौ १६ काठमाडौं । धितोपत्र बजारमा शेयर कारोबार मापक नेप्से परिसूचक झिनो अङ्कले ओरालो लागेको छ । नेपाल स्टक एक्सचेञ्जका अनुसार नेप्से परिसूचक एक दशमलव शून्य आठ अङ्कले ओरालो लागेर एक हजार नौ सय ७२ दशमलव २९ मा पुगेको छ ।

यस्तै ठूला कम्पनीको कारोबार मापन गर्ने सेन्सेटिभ परिसूचक शून्य दशमलव ६६ अङ्कले ओरालो लागेर तीन सय ८३ दशमलव ९३ मा पुगेको छ । कुल दुई सय २५ कम्पनीका ३९ लाख ५५ हजार आठ सय ८६ कित्ता शेयर रु एक अर्ब ३८ करोड ३४ लाख ६२ हजार एक सय ६२ मूल्यमा खरिद बिक्री भए ।

नेप्सेका अनुसार कारोबार भएका कूल १३ उपसमूहमध्ये बिहीबार छ उपसमूहको शेयर मूल्यमा गिरावट आएको छ भने सात उपसमूहको शेयर मूल्यमा वृद्धि भएको छ । बैंकिङ दुई दशमलव १९, व्यापार छ दशमलव ८१, उत्पादन तीन दशमलव ३४, अन्य २८ दशमलव ६३, सामूहिक लगानी कोष शून्य दशमलव शून्य एक, लगानी शून्य दशमलव ११ अङ्कले ओरालो लागेको छ ।

यस्तै होटल तथा पर्यटन २४ दशमलव ८३, विकास बैंक सात दशमलव २१, जलविद्युत् १० दशमलव ३८, वित्त २१ दशमलव ६८, निर्जीवन बीमा ६२ दशमलव १४, लघुवित्त एक दशमलव ६९ र जीवन बीमा ५४ दशमलव ८१ अङ्कले उकालो लागेको छ । आजको कारोबारपछि बजार पूँजीकरण रु २८ खर्ब २९ अर्ब चार करोड १५ लाख ७६ हजार एक सय ६७ बराबर रहेको छ ।

नेप्सेका अनुसार कारोबारका आधारमा नेपाल दूरसञ्चार कम्पनी शीर्षस्थानमा छ । सो कम्पनीको रु १२ करोड २७ लाख पाँच हजार छ सय ५६ बराबरको कारोबार भयो । यस्तै हिमालयन एभरेष्ट इन्स्योरेन्स रु पाँच करोड ६५ लाख ५४ हजार सात सय ८१, नेष्डो समृद्धि लघुवित्त रु चार करोड ८ड लाख ६५ हजार पाँच सय ४०, रिडी हाइड्रोपावर रु चार करोड १६ लाख ६३ हजार सात सय ९७ र अरुण काबेली पावरको रु तीन करोड ८२ लाख ८३ हजार चार सय ७७ बराबरको कारोबार भई शीर्ष पाँचभित्र परेका छन् ।

नेप्सेका अनुसार हिमालयन एभरेष्ट इन्स्योरेन्स कम्पनीको शेयर मूल्यमा १० प्रतिशतले वृद्धि भई सकारात्मक सर्किट लागेको छ । अप्पर हेवा खोला हाइड्रोपावर छ दशमलव ५८, माहुली लघुवित्त पाँच दशमलव ५८, सप्तकोसी डेभलपमेन्ट बैंक पाँच दशमलव २२ र प्रोगेसिभ फाइनान्सका लगानीकर्ताले तीन दशमलव ८२ प्रतिशतले कमाएका छन् ।

त्यस्तै राप्ती हाइड्रो चार दशमलव ३८, गणपति लघुवित्त चार दशमलव शून्य एक, मैलुङखोला जलविद्युत् कम्पनी तीन दशमलव ६७, एनआइबीएल समृद्धि फण्ड दोस्रो तीन दशमलव १३ र नेपाल पुनर्बीमा कम्पनीका लगानीकर्ताले तीन प्रतिशतले गुमाएका छन् ।