काठमाडौं । नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ले देशको वर्तमान राजनीतिक परिस्थितिमा निकासका लागि निर्वाचन नै सबैभन्दा उपयुक्त विकल्प भएको बताएका छन् ।

स्वतन्त्र विद्यार्थी युनियन, बानेश्वर बहुमुखी क्याम्पसद्वारा आयोजित पूर्व स्ववियू सभापति, क्रियाशील संघ–संगठनका अध्यक्ष, पूर्व अध्यक्ष, राष्ट्रिय तथा अन्तर्राष्ट्रिय खेलाडी सम्मान, नव आगन्तुक विद्यार्थी स्वागत तथा बेजोड सांस्कृतिक कार्यक्रम–२०८२ मा बोल्दै दाहालले देश विशेष परिस्थितिबाट अगाडि बढिरहेको उल्लेख गरे।

उनले भने, ‘म अहिले देशको राजनीतिक परिस्थितिमा धेरै भन्न चाहन्नँ । निर्वाचन मुखैमा आइपुगेको छ । जेनजी आन्दोलनपछि देखिएको नयाँ परिस्थितिमा सार्वजनिक रूपमा अगाडि बढ्ने र देशलाई सहज निकास दिने सबैभन्दा राम्रो विकल्प अब निर्वाचन नै हो । अन्य विकल्पतिर गइयो भने देश फेरि अर्को दुर्घटनामा पर्न सक्छ ।’

दाहालले नेपाली जनताको एकता, राजनीतिक दल, विभिन्न संघ–संस्था, पत्रकार र सबैको सामूहिक प्रयासबाट मात्र संकटमा परेको राष्ट्रलाई निकास दिन सकिने बताए । उनले अराजकता फैलिन सक्छ भन्ने सन्त्रास र आशंकाबाट देशलाई मुक्त गर्ने जिम्मेवारी सबैको साझा भएको पनि स्पष्ट पारे।

युवा तथा विद्यार्थीको भूमिकालाई विशेष महत्व दिँदै उनले भने, ‘देशको वर्तमान अवस्थामा युवा विद्यार्थीको काँधमा अझ ठूलो जिम्मेवारी छ । जेनजी आन्दोलन युवाहरु, विशेषगरी नव युवाको सक्रियताबाट अघि बढेको हो । पछिल्लो समय युवाहरु राजनीतिमा रुचि राख्दैनन् भन्ने धारणा थियो, तर जेनजी आन्दोलनले युवाहरु देशको परिस्थितिप्रति सचेत र जागरुक रहेको प्रमाणित गरेको छ ।’

कार्यक्रममा विभिन्न क्षेत्रमा योगदान पुर्याएका व्यक्तिहरूलाई सम्मान गरिएको थियो भने नव आगन्तुक विद्यार्थीलाई स्वागत गर्दै सांस्कृतिक कार्यक्रमसमेत प्रस्तुत गरिएको थियो ।