काठमाडौं । प्रतिनिधिसभा निर्वाचन नजिकिँदै गर्दा मोरङ–३ को राजनीतिक तापक्रम बढ्दो छ । यहीबीच नेपाली कांग्रेसले पुनः उम्मेदवार बनाएका डा. सुनिल शर्माको उम्मेदवारीलाई लिएर क्षेत्रभर बहस र चर्चा सुरु भएको छ । प्रश्न एउटै छ—डा. शर्मालाई फेरि किन जिताउनुपर्छ ?

पहिलो कारण, कार्यसम्पादन. २०७९ मा ऐतिहासिक मतान्तरसहित निर्वाचित भएका डा. शर्माले संसद्मा ‘हाजिर मात्र हुने’ सांसदको पहिचान बनाएनन् । स्वास्थ्य बीमा, बजेटको न्यायोचित वितरण, शिक्षा र सार्वजनिक स्वास्थ्यसँग सम्बन्धित मुद्दामा उनी निरन्तर बोलिरहे। पार्टीको ह्विपभन्दा माथि उठेर नागरिकका पक्षमा आवाज उठाउने सांसदको रूपमा उनले आफूलाई स्थापित गरे।

दोस्रो, सेवा र राजनीति बीचको स्पष्ट रेखा - सांसद बनेपछि पनि तलब–भत्ता नलिने निर्णय केवल प्रतीकात्मक होइन, उनको राजनीतिक दर्शनको प्रतिबिम्ब हो। राजनीति पद, सुविधा र पहुँचका लागि होइन भन्ने सन्देश उनले व्यवहारमै दिएका छन्। मोरङ–३ का मतदाताका लागि यो विश्वासको आधार बनेको छ।

तेस्रो, क्षेत्रसँगको गहिरो सम्बन्ध - डा. शर्मा विकासको वाचा गर्ने नेतामात्र होइनन्, प्रत्यक्ष सेवा गर्ने प्रतिनिधि हुन्। नोबेल मेडिकल कलेजमा आफ्नै निर्वाचन क्षेत्रका नागरिकका लागि ५० शय्याको निःशुल्क क्याबिन स्थापना, निःशुल्क स्वास्थ्य शिविर, एम्बुलेन्स हस्तान्तरण—यी सबै चुनावी नारा होइनन्, कार्यान्वयन भइसकेका तथ्य हुन्।

चौथो, समावेशी सोच र सामाजिक न्याय- एक हजारभन्दा बढी दलित र जनजाति विद्यार्थीलाई चिकित्साशास्त्र र स्वास्थ्य शिक्षामा अवसर दिनु सामान्य राजनीतिक अभ्यास होइन। सन्थाल समुदायका पहिलो डाक्टर उत्पादन हुनु यसकै प्रमाण हो। यो दृष्टिकोणले डा. शर्मालाई केवल मोरङ–३ का होइन, राष्ट्रिय स्तरकै सामाजिक न्यायको प्रतिनिधि बनाएको छ।

पाँचौं, राजनीतिक परिपक्वता र इतिहास - सशस्त्र द्वन्द्वकालमा लोकतान्त्रिक शक्ति र माओवादी आन्दोलनबीच संवादको पुल बनेका डा. शर्मा संकटका बेला समाधान खोज्ने नेता हुन् भन्ने प्रमाणित भइसकेको छ। संसद्मा उनको उपस्थितिले द्वन्द्व होइन, संवादलाई प्राथमिकता दिन्छ।

छैटौं, विश्वसनीयता र स्पष्टता- उनी जे बोल्छन्, लुकाएर बोल्दैनन्। आफ्नै पार्टीभित्रका कमजोरीमाथि समेत सार्वजनिक रूपमा प्रश्न उठाउन सक्ने क्षमता आजको राजनीतिमा दुर्लभ छ। यही कारण सामाजिक सञ्जालदेखि संसद्सम्म उनको आवाज फरक र प्रभावशाली देखिन्छ।

अन्ततः, मोरङ–३ ले फेरि कस्तो प्रतिनिधि चाहन्छ भन्ने प्रश्नमा उत्तर आफैं स्पष्ट हुँदै गएको छ काम गरेर देखाइसकेको, सुविधा त्याग्न सक्ने, नागरिकको भाषा बोल्ने र राष्ट्रिय बहसलाई प्रभावित गर्न सक्ने सांसद। यही कारण डा. शर्माको उम्मेदवारीलाई मोरङ–३ मा केवल दोहोरिने उम्मेदवारी होइन, निरन्तरताको परीक्षण का रूपमा हेरिएको छ।

र यही निरन्तरताले नै मोरङ–३ का मतदातालाई फेरि उनलाई जिताउनुपर्ने तर्क बलियो बनाएको छ।