काठमाडौँ । धरान उपमहानगरपालिकाका मेयर हर्क साम्पाङले धरानमा भारतीय फिल्म 'आदीपुरुष' प्रदर्शनमा रोक लगाएका छन् ।

उनले सामाजिक सञ्जालमा स्टाटस लेख्दै फिल्म प्रदर्शनमा रोक लगाएको जनाएका हुन् । धरानमा आदिपुरुषको प्रदर्शन नगर्नू होला जय देश,'उनले लेखेका छन् । 

यस्तै हिजो मात्रै काठमाडौं महानगरका मेयर बालेनले सोमबारदेखि महानगरमा हिन्दी फिल्म प्रदर्शनमा रोक लगाउने घोषणा गरेका थिए ।

गतबिहीबार उनले तीन दिनभित्र विवादित संवाद भारतबाटै नसच्याएसम्म कुनै पनि हिन्दी फिल्म प्रदर्शन गर्न नदिने बताएका थिए।

काठमाडौं महानगरभित्र हिन्दी फिल्म प्रदर्शन रोकिएसँगै पोखरा र धरानमा पनि आदिपुरुष प्रतिबन्ध गरिएको छ।

ओम राउतले निर्देशन गरेको फिल्ममा प्रभास रामको भूमिकामा देखिएका छन् भने कृति सेनन सीताको भूमिकामा देखिएकी छन्। सैफ अली खान रावणको भूमिकामा देखिएका छन्।