काठमाडौं । प्रधानमन्त्री पुष्पकमल दाहाल प्रचण्डले पूर्वसत्ता साझेदार नेपाली कांग्रेसले आफूलाई धोकाको आरोप लगाउन नमिल्ने बताएका छन् ।
विश्वासको मत लिनुअघि बुधबार प्रतिनिधि सभा बैठकलाई सम्बोधन गर्दै प्रधानमन्त्री प्रचण्डले कांग्रेसलाई जवाफ दिएका हुन्।
उनले आफूले लगाएका सबै गुन बिर्सिएर कांग्रेसले धोकेबाजको आरोप लगाउनु गलत भएको बताए।
धोकाको आरोप अहिलेका सत्ता साझेदार एमालेका अध्यक्ष केपी शर्मा ओलीले लगाउन मिल्ने पनि उनले बताए।
प्रधानमन्त्री प्रचण्डले भने,‘यति छिट्टै सबै गुन बिर्सिएर धोका भन्ने के हो धोका भनेको’,‘धोकाको आरोप त बरु मलाई प्रधानमन्त्री बनाउने दल त त्यसको नेतृत्व गर्नुभएको माननीय केपी ओलीजीले लगाउन मिल्छ। कांग्रेसका साथीहरूले मिल्दैन।’
