काठमाडौं । नेपाली कांग्रेसका सांसद रामहरि खतिवडाले सरकारको इन्जिन नै काम नलाग्ने भइसकेकाले गियर परिवर्तन गरेर काम नहुने बताएका छन् ।

बुधवार प्रतिनिधि सभा बैठकमा बोल्दै सांसद खतिवडाले सरकारको इन्जिन काम नलाग्ने भएको बताएका हुन् । उनले सरकारले गियर परिवर्तन गरे पनि केही काम नगर्ने बताए ।

उनले भने,"केही दिन अगाडी प्रधानमन्त्रीज्युले संसदमा बोलेको सुनेँ । सरकारको गियर परिवर्तन गर्नुपर्यो भन्नुभयो । एक्सिलेटर नै बिग्रिएको र इन्जिन नै काम नलाग्ने सरकारको गियर परिवर्तनले केही काम गर्दैन भन्ने आभास हामीलाई भएको छ" । 

उनले सरकारको न्यूनतम साझा कार्यक्रममा विभिन्न आयोगहरू गठन गर्ने उल्लेख गरिएको तर  सहकारी प्रकरणमा संसदीय समिति गठन गर्न नसक्ने सरकारले कसरी अन्य समिति गठन गर्छ त्यो अचम्मको बिषय रहेको बताए ।

"सहकारी ठगीको एउटा संसदीय संसदीय समिति गठन गर भनेर आवाज उठाउँदा भागेर हिँड्ने सरकारले कस्तो आयोग गठन गर्ला त्यो पनि अचम्मको विषय प¥यो । जनतालाई ढाँट्ने काम नहोस्" उनले भने।