काठमाडौं । नेकपा एकीकृत समाजवादीका नेता झलनाथ खनालले सुदूरपश्चिमको मुख्यमन्त्रीको विषयमा प्रधानमन्त्री पुष्पकमल दाहालसँग सकारात्मक कुराकानी भएको बताएका छन् । 

मंगलबार बिहान प्रधानमन्त्री दाहालसँग भएको भेटमा मुख्यमन्त्रीको दाबीमा देखिएको समस्या मिलाउने विषयमा छलफल भएको हो ।

नेता खनालले भने, ‘सुदूरपश्चिम प्रदेशमा धेरै ठूलो समस्या छैन । यसैका कारण गठबन्धनमा समस्या सिर्जना पनि हुँदैन,’ । ‘त्यहाँ एकीकृत समाजवादीलाई मुख्यमन्त्री दिनेबित्तिकै सबैकुरा मिल्छ । मैले यही कुरा प्रधानमन्त्रीलाई भनेँ ।’

आजको भेटमा नागरिक उन्मुक्ति पार्टी (नाउपा)का अध्यक्ष रञ्जिता श्रेष्ठ पनि रहेको खनालले बताए । तीनैजना बीच एक खालको समझदारी बनेको उनको भनाई छ ।