काठमाडौं । प्रधानमन्त्री पुष्पकमल दाहालले बिहीबार प्रतिनिधिसभा बैठकलाई हालै आफूले गरेको भारत भ्रमणबारे जानकारी गराएका छन् ।
भारतीय प्रधानमन्त्री नरेन्द्र मोदीको तेस्रो कार्यकालको शपथग्रहण कार्यक्रममा सहभागी हुन उनी भारत गएका थिए । गएको जेठ २७ गते उनी उक्त कार्यक्रममा सहभागी भएका थिए । उनले भ्रमणले दुई देशबीच आपसी सद्भाव वृद्धि गर्न उल्लेख्य भूमिका खेलेको बताए ।
उनले भने,“यस भ्रमणले दुई देशबीच आपसी सद्भाव वृद्धि गर्न उल्लेख्य भूमिका खेलेको छ,” ।
प्रधानमन्त्री दाहालले यसपटकको भ्रमणमा कुनै एजेन्डमा छलफल गर्न नभएकोले जानुअघि छलफल र परामर्श नगरिएको प्रष्ट पारे । भारतीय प्रधानमन्त्रीबाट लिखित निमन्त्रणा आएपछि शपथग्रहण समारोहमा सहभागी हुन आफू भारत गएको उनले बताए ।
भ्रमणका बेला भारतीय प्रधानमन्त्री मोदीसँग संक्षिप्त द्विपक्षीय वार्ता भएको उनले जानकारी दिए । यस्तै उनले भारतीय राष्ट्रपतिसँग पनि शिष्टाचार भेटवार्ता भएको बताए ।
प्रधानमन्त्री दाहालले भने “मोदीजीसँग नेपाल भारत सम्बन्ध थप मजबुत बनाउने, दुई देशबीच भएका सम्झौताको प्रभावकारी कार्यान्वयनलगायत विषयमा छलफल भयो,” ।
मोदीलाई आफूले नेपाल भ्रमणको निम्तो दिएको समेत उनले संसद्लाई जानकारी गराए । उपयुक्त समयमा नेपाल भ्रमणमा आउने वचन मोदीले दिएको उनले सुनाए ।
