काठमाडौं । मंगलबार सेयर बजारमा दोहोरो अंकको गिरावट भएको छ ।
यो साता आइतबार र सोमबार लगातार दुई दिन बढेको बजार मंगलबार भने २७.३९ अंकले घटेर २६६३.३२ को बिन्दुमा बन्द भएको नेपाल स्टक एक्सचेन्जले जनाएको छ ।
बजार सँगै कारोबार रकममा पनि गिरावट आएकोे छ । सोमबार ७ अर्बको कारोबार भएको बजारमा मंगलबार कारोबार घटेर साढे ४ अर्बमा झरेको छ । ४५ हजार ८७० वटा कारोबारमा १ करोड ३ लाख ३० हजार ५०२ कित्ता सूचीकृत धितोपत्र किनबेच हुँदा ४ अर्ब ५९ करोड ३७ लाख २७ हजारको कारोबार भएको छ ।
मंगलबार म्युचुअल फन्ड बाहेक सबै उपसूचकमा गिरावट हुँदा नेप्से पनि घटेको छ । वित्त कम्पनी उपसूचक सर्वाधिक २.७६ प्रतिशतले गिरावट हुँदा होटल तथा पर्यटन उपसूचक १.९३ प्रतिशतले गिरावट भएको छ । यस्तै बैंकिङ उपसूचक ०.३६ प्रतिशतले गिरावट भएको छ ।
