.jpg)
काठमाडौं । वरिष्ठ अधिवक्ता दिनेश त्रिपाठी रवि लामिछानेको मुद्दामा सहकारी पीडितहरूको तर्फबाट बहस गर्न भैरहवा पुगेका छन् ।
रुपन्देहीको बुटवलस्थित सुप्रिम सहकारी संस्थाका पीडितहरूको तर्फबाट जिल्ला अदालतमा बहस गर्न त्रिपाठी बुधबार भैरहवा पुगेका हुन् ।
बुधबार उनले सामाजिक सञ्जालमा सहकारी पीडितहरूकोतर्फबाट बहस गर्न भैरहवा हिँडेको बताएका हुन् ।
त्रिपाठीले रवि मुछिएको प्रकरणमा निरन्तर सहकारी पीडितहरूको तर्फबाट बहस गरिरहेका छन् ।
काठमाडौंको कालिमाटीस्थित स्वर्णलक्ष्मी सहकारी संस्थाको बचत रकम हिनामिना प्रकरणमा पीडितकोतर्फबाट बहस गर्दा उनले माघ २ गते रास्वपा कार्यकर्ताको कुटाइ खानु परेको थियो ।
उनले पोखराको सूर्यदर्शन सहकारी र काठमडौंको स्वर्णलक्ष्मी सहकारी हिनामिना प्रकरणमा पनि पीडितहरूको तर्फबाट बहस गरिसकेका छन् ।
सुप्रिम सहकारी ठगी प्रकरणमा रुपन्देही जिल्ला अदालतमा बुधबारदेखि सुनुवाइ सुरु भएको छ। यस प्रकरणमा मुख्य मुख्य प्रतिवादी लामिछाने मंगलबार अदालतमा उपस्थित हुन भैरहवा पुगिसकेका छन् ।
उनी बुधबार अदालतमा उपस्थित भएपछि मुद्दाको सुनुवाइ न्यायाधीश प्रल्हादकुमार योगीको अघि बढिसकेको छ ।
