काठमाडौं । प्रधानन्यायाधीश डा. मनोजकुमार शर्माले आफ्नो नाम जोडेर अमेरिकामा घुससम्बन्धी विषयमा प्रकाशित समाचारप्रति आपत्ति जनाएका छन्।

बिहीबार विज्ञप्ति जारी गर्दै उनले ‘दियो पोस्ट’ लगायतका सञ्चारमाध्यममा आफ्नो नामसमेत जोडेर प्रकाशित समाचारप्रति आश्चर्यचकित र स्तब्ध भएको बताएका हुन्।

प्रधानन्यायाधीश शर्मा र रास्वपा सांसद पोखरेलको नाममा अमेरिकामा ‘घुस’ फिक्सर इनमको मोबाइलले खुलाएको प्रमाण लगायतका शीर्षकमा प्रकाशित समाचारमा उल्लेखित व्यक्ति र प्रसङ्गमा आफ्नो कुनै संलग्नता नरहेको उनले स्पष्ट पारेका छन्।

उनले सम्बन्धित व्यक्तिहरूसँग आफ्नो प्रत्यक्ष वा परोक्ष रूपमा चिनजान तथा सम्पर्क नरहेको र आफूले कहिल्यै नभेटेको पनि विज्ञप्तिमा उल्लेख गरेका छन्।

विज्ञप्तिमा भनिएको छ, ‘यसरी आधारहीन, झुठ्ठा, कपोलकल्पित र जनतामा भ्रम छर्ने दुषित उद्देश्यबाट प्रसारित समाचारको म भत्र्सना गर्दछु।’

प्रधानन्यायाधीश शर्माले समाचारमा उल्लेख गरिएका नोभेम्बर, डिसेम्बर र जनवरी महिनाका घटनाक्रममा आफू प्रधानन्यायाधीशसमेत भइनसकेको अवस्था रहेको बताएका छन्।

उनले आधारहीन र कपोलकल्पित समाचारको भ्रममा नपर्न सम्पूर्ण जनमानसलाई अनुरोधसमेत गरेका छन्।