काठमाडौं । शुक्रबारबाट सुरु भएको नयाँ सिजनको सहिद स्मारक ए डिभिजन लिग फुटबल प्रतियोगिता अन्तर्गत आज शनिबार तीन खेलहरु हुँदैछ ।
लिग अन्तर्गत आज त्रिपुरेश्वरस्थित दशरथ रंगशालामा दुई खेल र च्यासल मैदानमा एक खेल हुनेछ ।
च्यासल मैदानमा हुने दिनको एक खेलमा चर्चे ब्वाइज युनाइटेडले नेपाल पुलिस क्बलसँग खेल्नेछ । यता दशरथ रंगशालामा हुने पहिलो खेलमा एपीएफ क्लब र थ्री स्टार क्लबबीच प्रतिस्पर्धा हुनेछ । यी दुबै खेल दिउँसो २:३० बजे सुरु हुनेछ ।
यस्तै दशरथ रंगशालामा हुने दोस्रो खेलमा मनाङ मर्स्याङ्दी क्लब र हिमालयन शेर्पा क्लबबीच प्रतिस्पर्धा हुनेछ । मनाङ र शेर्पाबीचको खेल साँझ ५:३० बजे सुरु हुनेछ ।
हिजो भएको उद्घाटन खेलमा फ्रेन्ड्स क्बललाई एक शून्य गोलले हराउँदै नवप्रवेशी टोली एफसी खुमलटारले विजयी सुरुवात गरेको छ ।
यस सिजनको लिगमा साविक विजेता मछिन्द्र क्लबसहित मनाङ मर्स्याङ्दी, त्रिभुवन आर्मी फुटबल क्लब, थ्री स्टार क्लब, नेपाल पुलिस क्लब, एपीएफ क्लब, चर्च ब्वाइज फुटबल क्लब, हिमालयन शेर्पा, संकटा, फ्रेन्ड्स क्लब, एफसी खुमलटार, जावालाखेल युथ क्लब, न्युरोड टिम (एनआरटी) र सातदोबाटो युथ क्लब छन् ।
यस्तै यसपटक लिग विजेताले ७५ लाख, दोस्रो टोलीले ५० लाख र तेस्रो हुने टोलीले २५ लाख रुपैयाँ पाउनेछन् । फेयर प्ले टिमले तीन लाख पाउने छ । मोस्ट भ्यालुएबल खेलाडीले तीन लाख, सर्वाधिक गोलकर्ता र सर्वोत्कृष्ट गोलकिपरले दुई लाख र इमर्जिङ प्लेयरले एक लाख ५० हजार रुपैयाँ पाउने छन् ।
लिग अघिको आयोजित पत्रकार सम्मेलनमा बोल्दै सहभागि १२ क्लबका प्रशिक्षक र कप्तानले लिगका लागि तयारी राम्रो भएको र लिगमा राम्रो नतिजा ल्याउने बनाएका छन् ।
यस्तै यसपटको ए डिभिजन लिगका रहेक खेल स्पेस फोर के टेलिभिजनले प्रत्यक्ष प्रसारण गर्नेछ ।
