काठमाडौं । राजधानीमा जारी शहिद स्मारक ए डिभिजन लिग फुटबल प्रतियोगिता अन्तर्गत दोस्रो राउण्डको खेलमा हिमालयन शेर्पा क्लबले नेपाल पुलिस क्लबलाई पराजित गरेको छ ।
बुधबार दशरथ रंगशालामा भएको खेलमा शेर्पाले पुलिसलाई १-० गोलले पराजित गरेको हो ।
हिमालयनको जितमा डिफेन्डर अमृत श्रेष्ठले निर्णायक गोल गरे ।
अमृतले खेलको इन्जुरी समयमा गोल गरेका थिए । जुन गोल हिमालयनको जितमा निर्णायक बन्यो ।
खेलमा शेर्पाले ३१औं मिनेटमा गोलको लागि पेनाल्टीको अवसर पाएको थियो तर उक्त पेनाल्टीमा शेर्पाका आशिष लिम्बु चुके । उनको पेनाल्टी पुलिसका गोलकिपर सत्रुधन चौधरीले बचाए ।
उक्त जितसँगै शेर्पाले २ खलबाट ४ अंक बनाएको छ । यसअघि पहिलो खेलमा शेर्पा मना सँग १-१ गोलको बराबरी खेलेको थियो । यता पुलिसले भने लगातार दोस्रो खेलमा पराजित भएको हो । पुलिस पहिलो खेलमा चर्च ब्वाइज सँग पराजित भएको थियो ।
