असोज २४ काठमाडौं । देशभर आज ५ सय ९६ जना कोरोना सङ्क्रमित थपिएका छन् । ९ हजार २ सय ३७ वटा नमुनाको पिसिआर विधिबाट परीक्षण गर्दा ५ सय ६५ जना तथा ३ हजार १ सय ६७ वटा नमुनाको एन्टीजेन विधिबाट परीक्षण गर्दा १३ जना गरी जम्मा ५ सय ९६ जनामा संक्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।
गएको २४ घण्टामा ८ सय ७१ जना सङ्क्रमणबाट मुक्त भएका छन् । मन्त्रालयको तथ्याङ्क अनुसार कोरोना सङ्क्रमणबाट निको भएको दर ९६ दशमलव ७ प्रतिशत छ । आज कोरोना सङ्क्रमणबाट १० जनाको मृत्यु भएको छ । योसँगै कोरोना सङ्क्रमणबाट मृत्यु हुनेको सङ्ख्या ११ हजार २ सय ३१ जना पुगेको छ ।
देशभरिका होम आइसोलेसन र संस्थागत आइसोलेसनमा गरी जम्मा १५ हजार २४ जना सक्रिय सङ्क्रमितले उपचार गराइरहेको मन्त्रालयले जनाएको छ ।
जसमा ३ सय २२ जनाले आइसियु र १ सय १३ जनाले भेन्टिलेटरमा उपचार गराइरहेको स्वास्थ्य तथा जनसङ्ख्या मन्त्रालयले जनाएको छ ।
