काठमाडौं । पूर्व गृह मन्त्री तथा राष्ट्रिय स्वतन्त्र पार्टी (रास्वपा) का सांसद सुदन गुरुङले आफ्नो सम्पत्तिको विषयमा उठेका प्रश्नहरूको छानबिनका लागि सहजीकरण गर्न आफूले मन्त्री पदबाट राजीनामा दिएको खुलासा गरेका छन् ।
आइतबार रास्वपा गोरखाको पहिलो जिल्ला अधिवेशन सत्रलाई सम्बोधन गर्दै सांसद गुरुङले सार्वजनिक पदमा रहँदा उठेका सवालहरूको जवाफ दिन आफू पूर्ण रूपमा जिम्मेवार बनेको बताएका हुन् ।
अधिवेशनलाई सम्बोधन गर्दै उनले भने, “मैले सार्वजनिक पदमा बसेर काम गरेपछि उठेका प्रश्नहरूको सामना गर्नुपर्छ भनेरै छानबिन समितिसमक्ष बयान दिएको हुँ । बयानका क्रममा कतिपय प्रश्नहरू निकै कडा थिए, जसको मैले सोहीअनुसार सहज र स्पष्ट जवाफ दिएको छु ।“
उनले छानबिन समितिको प्रतिवेदन अहिले प्रधानमन्त्री कार्यालयमा पुगिसकेको जानकारी दिँदै आफूले पूर्ण रूपमा सफाइ पाउनेमा आशावादी रहेको बताए । आफू निर्दोष सावित हुने र सरकारले पुनः गृह मन्त्रालयको जिम्मेवारी सुम्पिने सम्भावनाप्रति सङ्केत गर्दै गुरुङले एउटा फरक आग्रह समेत गरे ।
उनले भने, “यदि समितिबाट सफाइ पाएर सरकारले मलाई पुनः गृहमन्त्रीको जिम्मेवारी दियो भने, मन्त्रालयमा आएर बधाई दिने र तस्बिर खिच्ने कामका लागि कम्तीमा सुरुका दुई महिना नआइदिनुहोला। त्यो समय म मन्त्रालयका कामलाई प्राथमिकता दिन चाहन्छु।”
उनले आफ्नो मुख्य ध्यान काममा केन्द्रित गर्न चाहेकाले यस्तो आग्रह गरेको स्पष्ट पारे। सम्बोधनका क्रममा सांसद गुरुङले रास्वपाको सङ्गठन निर्माण र आगामी नेतृत्वको कार्यशैलीका बारेमा पनि स्पष्ट धारणा व्यक्त गरे । अब बन्ने जिल्ला सभापति राजधानी केन्द्रित हुन नहुने उनको तर्क थियो ।
“अब बन्ने सभापतिले जिल्लामै बसेर पार्टीका गतिविधिहरू अगाडि बढाउनुपर्छ,“ गुरुङले भन्नुभयो, “राजधानीमा बसेर जिल्लाको सभापति बन्ने हो भने चुनावका बेला मात्र जनतामाझ पुगिन्छ, जसले पार्टीलाई फाइदा गर्दैन ।“
कार्यक्रममा उनले आफू गृह मन्त्री हुँदा आम जनताबाट अभूतपूर्व साथ र सहयोग पाएको स्मरण गर्दै निर्वाचनमा विजयी गराउने गोरखाका सम्पूर्ण मतदाताहरूलाई विशेष धन्यवाद समेत ज्ञापन गरे ।
